వాసి - రాశి

మ్రాను వలెను ఒడ్డు పొడుగు
పెంచుకొనుట కాదు గొప్ప,
బూరుగెంత ఎదిగెనేమి
ఏమి ఫలము దాని వలన?


వికసించిన మల్లెపూవు
వాడిపోవు వేగముగా ,
అయిన నేమి అంతలోనే
వెదజల్లును పరిమళాలు !


కాకి వలెను కలకాలము
జీవించుట కంటే నీవు
హంస వోలె మంచి నెంచి
కొద్దికాల మున్న చాలు!


మంచి ముత్య మొకటే చాలు
తళుకు రాళ్ళు తట్టెడేల?
చెప్పెను కద మన వేమన,
రాశి కంటే వాసి గొప్ప!!

దైవ ప్రార్ధన

1    నీ పాద కమల సేవయు 
      నీ పాదార్చకుల తోడి నెయ్యమును నితాం 
      తాపార భూతదయయును 
      తాపస మందార నాకు దయసేయగదే!


2 .  ఎవ్వని చే జనించు జగమెవ్వని లోపల నుండు లీనమై 
      ఎవ్వని యందు డిందు పరమేశ్వరుడెవ్వడు మూలకారణం 
     బెవ్వ డనాది మధ్యలయుడెవ్వడు సర్వముదానే యైన వా
     డెవ్వడు , వానినాత్మభవు నీశ్వరునే శరణంబు వేడెదన్ !


3 . శ్రీ కైవల్యపదంబు జేరుటకునై చింతించెదన్ లోకర 
     క్షాకారంభకు భక్తపాలన కళాసారంభ కున్ దానవో
     ద్రేక స్తంభకు గేళిలోల విలసద్ద్రుగ్జాల సంభూతనా   
     నాకంజాత భవాండ కుంభకు మహా నందాంగనా డింభకున్ !


4 . ఆతత సేవజేసేద సమస్త చరాచర భూతసృష్టి వి 
     జ్ఞాతకు భారతీ హృదయ సౌఖ్యవిధాతకు  వేదరాశి ని  
     ర్ణేతకు దేవతా నికరనేతకు గల్మష జేతకున్ నత
     త్రాతకు ధాతకున్ నిఖిల తాపసలోక శుభప్రదాతకున్ !


5 . లావొక్కిం తయు లేదు ధైర్యము విలోలం బయ్యె ప్రాణంబులున్ 
    ఠావుల్ దప్పెను మూర్చ వచ్చే దనువున్ డస్సెన్ శ్రమంబయ్యెడిన్ 
    నీవే తప్ప నితః పరంబెరుగా మన్నింపం దగున్ దీనునిన్ 
    రావే ఈశ్వర కావవే వరద సంరక్షింపు భద్రాత్మకా !